ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានបញ្ជាឱ្យអាជ្ញាធរចាប់ឃាត់ខ្លួនជនដែលល្មើសចរាចរណ៍បុកមនុស្សបណ្តាលឱ្យស្លាប់នៅនឹងកន្លែងដោយមិនចាំបាច់សុំគោលការណ៍ពីស្នងការនគរបាលឡើយ។

សម្តេចបានចេញបទបញ្ជានេះក្នុងពិធី «បិទសន្និបាតបូកសរុបលទ្ធផលការងារបរិស្ថានឆ្នាំ២០២៣ និងលើកទិសដៅការងារឆ្នាំ២០២៤» នៅទីស្តីការក្រសួងបរិស្ថាន នារសៀលថ្ងៃទី២១ ខែធ្នូ ឆ្នាំ២០២៣។

សម្តេចធិបតី សង្កត់ធ្ងន់ដូច្នេះថា៖ «ខ្ញុំសូមចេញបទបញ្ជា ប្រសិនមានបទល្មើសជាក់ស្តែង បើកឡានបុកគេស្លាប់ មិនបាច់សុំគោលការណ៍ គឺចាប់តែម្តងទៅ ឃាត់ខ្លួនទៅ បើគាត់តវ៉ា វាយខ្នោះតែម្តងទៅ ហើយកូនប៉ូលីសធ្វើចុះ មិនបាច់ទៅសុំស្នងការអីទេ ទៅចាប់ចុះ»។

សម្តេចធិបតីបានប្រាប់ឱ្យ សមត្ថកិច្ចអនុវត្តតាមច្បាប់ ប្រសិនឃើញករណីជាក់ស្តែងកើតឡើងនៅនឹងកន្លែង ហើយសម្តេចអះអាងថា ខ្នងរបស់សមត្ថកិច្ចគឺនាយករដ្ឋមន្ត្រីកម្ពុជា។

សម្តេចធិបតីថ្លែងដូច្នេះ៖ «ប្រសិនជាធ្វើទៅមានបញ្ហា ទៅដល់កន្លែងគេដកបញ្ឈរជើង ប្រាប់ខ្ញុំ (សម្តេចធិបតី ហ៊ុន ម៉ាណែត) ខ្ញុំដំឡើងស័ក្តឱ្យ មេដែលចាត់ចែង ដាក់វិន័យបងប្អូនដែលធ្វើខុសគ្មានមូលហេតុ ខ្ញុំនឹងចាត់វិធានការ គ្នាខំធ្វើត្រូវ ត្រូវលើកទឹកចិត្ត»៕